काठमाडौं । नेपाली कांग्रेसकी नेतृ आरजु राणाको धनगढीस्थित निजी घर मर्मत गर्न सुदूरपश्चिम सरकारले १० लाख बजेट बिनियोजन गरेको विषय निराधार रहेको सुदूरपश्चिम प्रदेशको भौतिक पूर्वाधार विकास मन्त्रालयले जनाएको छ ।
केही अनलाइन सञ्चार माध्यममा राणाको निजी घर मर्मतका लागि प्रदेशले रकम छुट्याएको विषय आएपछि मन्त्रालयले खण्डन गरेको हो ।
मन्त्रालयका प्रवक्ता मोहन बहादुुर कुँवरले सार्वजनिक समाचार तथ्यहिन भएको बताए । उनका अनुसार भौतिक पूर्वाधार विकास मन्त्री प्रकाश बहादुर देउवाको सरकारी निवास मर्मतका लागि रकम छुट्याइएको हो ।
तर, मन्त्री देउवा आफ्नै निजी निवासमा रहीरहेको कारण उक्त बजेट खर्च नभएको कुँवरले जानकारी दिए ।
“सुदूरपश्चिम प्रदेश सरकारको आ.ब. २०८०/०८१ को बजेटमा यस मन्त्रालयको माननीय मन्त्रीज्यूको आवास भवन मर्मत तथा रंगरोगन गर्ने कार्यमा बिनियोजन गरिएको बजेट मन्त्रालय परिसरभित्रै रहेको सरकारी निवासको नियमित मर्मत सम्भारको लागि छुट्याइएको हो”, सार्वजनिक विज्ञप्ति भनिएको छ, “हालसम्म पनि माननीय मन्त्रीज्यू आफ्नै निजी निवासमा बसी आउनु भएको र मन्त्रालयबाट निवासका लागि कुनै पनि किसिमको सेवा सुविधा समेत नलिएको व्यहोरा जानकारी गराउँदछौं ।”
यस्ताे छ प्रदेश सरकारकाे विज्ञप्ति
